Gh’è nei to grandi – oci de ebrea

June 27th, 2014

come una luse – che me consuma;
no’ ti-ssì bèla – ma nei to oci
mi me vergogno – de aver vardà.
Par ogni vizio – mio ti-me doni
tuta la grazia – del to bon cuor,
a le me vogie – ti ti-rispondi,
come le vogie – mie fusse amor.
Sistu ‘na serva – no’ altro o pur
xé de una santa – ‘sta devozion ?
Mi me credevo – un òmo libero
e sento nascer – in mi el paron.
Vero xé forse – che in tuti i santi
gh’è un fià de l’ànema – del servidor,
ma forse, proprio – par questo, i santi
no’ se pardona – nel mondo amor;
no’ i canta, insieme – co’ done e fioi,
intorno ai foghi, – “El pan ! El vin !”,
co’ more l’anno – nei me paesi,
se prega un altro – anno al destin;
secondo el fumo – che va col vento,
scominzia i vèci – a profetar…
“O scarso, o grando – ne sia el racolto,
sperar xé tuto – e laòrar”.
Cussì mi vivo – zorno par zorno,
come un alegro – agricoltor,
vùi destraviarme – vardarme intorno,
méter un voto – fra mi e ‘l Signor…
Ma nei to grandi – oci de ebrea
ghe xé una luse – che no pardona;
ti-ssì una santa – e nei to oci
no vùi più creder – che gò vardà.

Giacomo Noventa, da Versi e poesie
1932

  • Spazio topo

  • you SHALL go in

  • Scansiona 1
  • What is and what should never be

    • [+]2015
    • [+]2014
    • [+]2013
    • [+]2012
    • [+]2011
  • Scansiona 4